MITROVICË – Një bombolë gazi ka shpërthyer në fshatin Kçiq të Mitrovicës gjatë ditës së sotme, në banesën me kryefamiljar Burhan Brahimin. Si pasojë e shpërthimit të bombolës 4-litërshe, 14 familjarët që jetonin në këtë shtëpi kanë marrë lëndime të ndryshme.
Bëhet me dije se 3 nga familjarët kanë marrë plagë më të rënda, ndërsa të tjerët kanë marrë lëndime më të lehta. 14 anëtarët e familjes janë duke u trajtuar në Spitalin e Prishtinës. Policia e Kosovës ka dhënë detaje në lidhje me shpërthimin e bombolës së gazit. “Katërmbëdhjetë persona kanë pësuar lëndime trupore si pasojë e shpërthimit të një bombole gazi në bodrumin e shtëpisë ku po qëndronin”, thuhet në raportin 24 orësh. Në raport më tej thuhet se përpos të lënduarve, nga shpërthimi ka pasur edhe dëme të konsiderueshme materiale.
Mediat e Kosovës raportojnë se vajza 10-vjeçare e familjes ka pësuar lëndime të shumta dhe është dërguar për mjekim të specializuar në Suedi.
Spitali në Prishtinë ka njoftuar se 4 pacientë janë në kujdes intensiv, ndërsa të tjerët janë transferuar në klinika të ndryshme të QKUK-ut. Të lënduarit janë vizituar nga politikanë të ndryshëm, si kryeministri Albin Kurti, ministri i Shëndetisë Arben Vitia, kryetari i komunës së Mitrovicës, Bedri Hamza./ZËRI/
