STAMBOLL- Presidenti ukrainas Volodymyr Zelenskyy tha sot se ai dhe presidenti turk Rexhep Tajip Erdogan ranë dakord të ndërmarrin "hapa të rinj" në bashkëpunimin e tyre në siguri, duke shtuar se ekziston vullneti politik dhe se grupet e punës të të dy vendeve do të finalizojnë detajet së shpejti.
“Kjo vlen kryesisht për fushat në të cilat ne mund ta mbështesim Turqinë: njohuritë, teknologjinë dhe përvojën”, shkroi ai në një postim në Telegram pas takimit me Erdoganin në Stamboll.
Zelensky shtoi se të dy udhëheqësit diskutuan bashkëpunimin e tyre të mundshëm në projektet e përbashkëta të infrastrukturës së gazit dhe shfrytëzimin e fushave të gazit. Sipas deklaratës së presidencës turke, Erdogan i tha Zelenskyt se Turqia do të vazhdojë të mbështesë negociatat midis Ukrainës dhe Rusisë.
Ai gjithashtu vuri në dukje se Turqia i kushton rëndësi të madhe sigurisë së lundrimit në Detin e Zi dhe se siguria e furnizimit me energji është me rëndësi jetike./ZËRI
