GREQI- Greqia është përballur këtë javë me temperatura rekord, duke sjellë probleme në të gjithë vendin, që çuan në vendimin për të mbyllur parakohe shkollat.
Akropoli, vendi turistik më i vizituar i Greqisë, u mbyll gjatë ditës së djeshme, ndërkohë që e njëjta masë do rë merret edhe sot.
Ministria e Kulturës është shprehur se siti arkeologjik i listuar në UNESCO në Athinë do të qëndrojë i mbyllur në orët e pikut të vapës që pritet të arrijnë 43 gradë Celsius edhe ditën e sotme.
Meteorologët kanë vënë në dukje se kjo është vala më e hershme e të nxehtit – e cila për Greqinë klasifikohet si temperatura që tejkalojnë 38 gradë Celsius për të paktën tre ditë – në historinë e regjistruar.
Ministria e krizës klimatike dhe mbrojtjes civile ka paralajmëruar për një rrezik shumë të lartë të zjarreve në rajonin e Atikës rreth Athinës.
Shkollat do të qëndrojnë të mbyllura në disa qarqe të vendit edhe për ditën e sotme, ndërsa ministria e punës ka këshilluar punonjësit e sektorit publik të punojnë nga shtëpia./ZËRI
