BRITANI E MADHE- Ish-kryeministri britanik Boris Johnson ka ngjallur një reagim të ashpër pasi shkeli protokollin mbretëror duke zbuluar në kujtimet e tij se mbretëresha Elizabeth II kishte kancer në kocka. Libri, i cili do të dalë më 10 tetor dhe pjesë të të cilit po publikohen që këtë javë në gazetën Daily Mail - media për të cilën Johnson është një prej prej "kolumnistëve" (shkruan artikujt shkurt) - tregoi ditët e fundit të Mbretëreshës, teksa ajo po strehohej në Kalanë Balmoral në Skoci.
Johnson zyrtarisht dha dorëheqjen vetëm dy ditë para vdekjes së Elizabeth II në shtator 2022, dhe në vitet që pasuan, ka pasur spekulime intensive për mënyrën se si ajo vdiq.
"Unë e di për një vit ose më shumë se ajo kishte një formë të kancerit të kockave dhe mjekët e saj ishin të shqetësuar se në çdo moment shëndeti i saj mund të degradonte,"-shkroi Johnson në librin e tij.
Dëshmia e ish-kryeministrit është e para që bëhet nga një ish-zyrtar i lartë lidhur me arsyen e vërtetë të vdekjes së Elisabeth II, kur në certifikatën e saj të vdekjes u shënua "pleqëria" si shkak për vdekjen e saj.
Buckingham Palace ka një politikë për të mos komentuar librat e botuar për familjen mbretërore dhe për këtë arsye as nuk i ka konfirmuar dhe as mohuar pretendimet e Johnson.
Johnson, i cili shërbeu si kryeministër nga viti 2019 deri në vitin 2022, kujton se udhëtoi në rezidencën mbretërore në Balmoral për të lajmëruar dorëheqjen para mbretëreshës. Me të mbërritur, ai kujton se ishte përshëndetur nga sekretari privat i Mbretëreshës, Edward Young, i cili e informoi atë se gjendja e saj ishte përkeqësuar ndjeshëm gjatë verës. Kur ata u ulën së bashku në dhomën e pritjes së Mbretëreshës, Johnson vuri re se ajo "dukej e zbehtë dhe e përkulur dhe kishte mavijosje të errëta në duar dhe kyçe, ndoshta nga serumet ose injeksionet".
“Por mendja e saj ishte krejtësisht e paprekur nga sëmundja e saj, dhe në intervale në bisedën tonë ajo ende lumturoi atë me një buzëqeshje të madhe dhe të bardhë,"-kujton Johnson.
Ndryshe nga mbretëresha, Mbreti Charles III dhe Kate, Princesha e Uellsit, kanë vendosur të jenë më të hapur për shëndetin e tyre. Të dy kanë ndarë detaje rreth diagnozave të tyre të kancerit. Megjithatë, ata zgjodhën të mos zbulonin formën specifike të kancerit me të cilin po përballej secili prej tyre, por bënë publike sëmundjen e tyre për të ndërgjegjësuar publikun./ZËRI
