SHBA- Shembja e urës në Baltimore ka krijuar shqetësime për zinxhirët e furnizimit global. Përveçse nga tragjedia kanë ndërruar jetë të paktën 6 persona, probleme të tjera kanë lindur me ndikimin që kjo urë ka në zinxhirët e furnizimit në SHBA. Zyrtarët thonë se transporti përmes portit të Baltimores - i cili grumbulloi më shumë se 47 milionë tonë mallra të huaja vitin e kaluar - do të pezullohet "deri në njoftimin e mëtejshëm".
Shkaku i saktë i përplasjes ende nuk është përcaktuar, por anija duket se po përjetonte një ndërprerje dhe lëshoi një sinjal alarmi përpara se të përplasej në urë, por për disa automjete nuk kishte kthim pas. Që nga ajo ditë, një operacion i madh kërkim-shpëtimi u zhvillua gjatë pjesës më të madhe të ditës së djeshme, por vetëm dy persona u nxorrën të gjallë nga uji. Njëri prej tyre mbetet në gjendje kritike.
Autoriteti Detar dhe Portual i Singaporit, flamurin e të cilit kishte anija "Dali", tha se certifikatat e anijes që mbulonin integritetin e saj strukturor dhe funksionalitetin e pajisjeve të saj ishin të vlefshme. Po ashtu, shtuan se anija i ishte nënshtruar dy inspektimeve të veçanta në qershor dhe shtator 2023.
Duke folur për BBC, Marco Frozone, drejtor i përgjithshëm i Institutit të Eksportit dhe Tregtisë Ndërkombëtare, i cili përfaqëson bizneset britanike, tha se: Do ndikohen marka të mëdha nga SHBA-ja, Britania e Madhe dhe BE-ja, përmendim General Motors, Ford, Jaguar, Land Rover, Nissan, Fiat dhe Audi. Për më tepër që Baltimore është një eksportues kryesor i gazit natyror të lëngshëm [LNG], dhe kjo do të thotë probleme edhe për Mbretërinë e Bashkuar dhe BE.
Përtej transportit detar, Porti i Baltimores lidhet drejtpërdrejt me rreth 150,000 vende pune.
Presidenti Joe Biden u tha gazetarëve se qeveria amerikane "do të lëvizë qiellin dhe tokën" për të rihapur portin dhe rindërtuar urën sa më shpejt të jetë e mundur. Por theksoi se procesi do të kërkojë një kohë të gjatë./ZËRI
