UKRAINË- Presidenti Volodymyr Zelenskyy ka mirëpritur sot liderët perëndimorë në Kiev për të shënuar përvjetorin e dytë të pushtimit në shkallë të plotë të Rusisë. Kryeministrja italiane Giorgia Meloni, kryeministri belg Alexander De Croo, kryeministri kanadez Justin Trudeau, si dhe Presidentja e Komisionit Evropian Ursula von der Leyen kanë mbërritur këtë mëngjes në fushën ajrore të Hostomel.
Kjo e fundit në fjalën e saj shprehu mirënjohje për rezistencën që Ukraina po bën përballë sulmeve të ashpra e të vazhdueshme ruse, teksa po përballet edhe me vështirësi për shkak të mungesës së financimeve dhe ndihmave me armatime nga aleatët perëndimorë.
“Faleminderit për trimërinë dhe kurajën që tregoni për të mbrojtur lirinë dhe pavarësinë e Ukrainës por që po luftojnë edhe për ne”.
"Për të mbrojtur këmbësorinë tonë ... ne kemi nevojë për një numër të madh predhash, të cilat nuk i kemi tani," tha Oleksandr, 45 vjeç, një komandant i një njësie artilerie.
Në një mesazh për përvjetorin e dytë të luftës, gjeneral kolonel Oleksandr Syrskyi, komandanti i përgjithshëm i forcave të armatosura të Ukrainës, falënderoi gjithashtu ushtarët ukrainas për sakrificat e tyre dhe aleatët perëndimorë për mbështetjen e tyre, duke thënë: “Çdo predhë, çdo tank, çdo Mjeti i blinduar, para së gjithash, i shpëton jetën një ushtari ukrainas.
Në fillim të këtij muaji, Zelenskyy shkarkoi komandantin e lartë ushtarak Valerii Zaluzhnyi dhe e zëvendësoi atë me Syrskyi, duke shënuar ndryshimin më të rëndësishëm që nga pushtimi në shkallë të gjerë. Autoritetet theksuan gjithashtu sukseset, duke përfshirë rrëzimin e një avioni rus të paralajmërimit dhe kontrollit të hershëm të premten, shkruajnë mediat e huaja.
Nëse konfirmohet, kjo do të shënonte humbjen e avionit të dytë të tillë në pak më shumë se një muaj. Ushtria ukrainase thotë se Rusia e përdor avionin për të drejtuar sulmet me raketa.
Lufta ka ardhur edhe në Rusi. Dronët goditën një fabrikë çeliku në rajonin e Lipetsk në Rusinë jugore të shtunën, duke shkaktuar një zjarr të madh, tha guvernatori rajonal Igor Artamonov, duke shtuar se nuk ka viktima. Mediat e pavarura ruse thanë se Fabrika Metalurgjike Novolipetsk është fabrika më e madhe e çelikut në Rusi./ ZËRI
