SHBA- Pikëpyetje janë ngritur në lidhje me shëndetin e Presidentit të SHBA-së, Donald Trump, i cili është shfaqur në publik me mavijosje të dukshme në dorën e tij të djathtë dhe ënjtje në gjymtyrët e poshtme. Sekretarja e shtypit e Shtëpisë së Bardhë, Caroline Levitt, dha sqarime të enjten, duke cituar një shënim mjekësor nga mjeku personal i presidentit.
Ajo lexoi se Trump kishte vënë re ënjtje të lehtë në gjymtyrët e poshtme në javët e fundit dhe iu nënshtrua një kontrolli të plotë mjekësor "si pjesë e monitorimit rutinë dhe për arsye parandaluese". Mjeku i presidentit diagnostikoi pamjaftueshmëri kronike venoze, një gjendje e zakonshme, më shumë e zakonshme tek njerëzit mbi 70 vjeç. Nga analizat nuk kishte prova dhe përjashtohet mundësia e trombozës venoze ose problemeve në sistemin arterial.
Sipas zëdhënëses, Trump iu nënshtrua gjithashtu analizave të gjakut dhe një elektrokardiograme, pa asnjë shenjë patologjike. Sa i përket mavijosjes në pjesën e pasme të dorës së djathtë, ajo i atribuohet "dëmtimit të lehtë të indeve të buta" nga shtrëngimet e shpeshta të duarve dhe marrja e aspirinës, e cila përfshihet në kuadrin e trajtimit parandalues të zemrës.
Levitt përfundoi duke thënë se shënimi mjekësor do t'u dërgohet gazetarëve të akredituar pranë Shtëpisë së Bardhë./ZËRI
