BRAZIL- Policia në Brazil bastisi shtëpinë dhe selinë e ish-presidentit të Brazilit, Jair Bolsonaro, orët e para të së premtes, teksa urdhëruan që të mbajë një byzylyk elektronik në kyçin e këmbës, duke i ndaluar atij të fliste me zyrtarë të huaj ose t'u afrohej ambasadave dhe duke i ndaluar atij të përdorte mediat sociale, raporton CNN.
Kufizimet, të urdhëruara nga Gjykata Supreme e Brazilit, u motivuan nga shqetësimet se Bolsonaro do të largohej nga vendi, mes gjyqit të tij për një komplot të dyshuar për të përmbysur rezultatet e zgjedhjeve presidenciale të vitit 2022 për të mbetur në pushtet. Bolsonaro ka mohuar të ketë bërë ndonjë shkelje.
Policia federale akuzoi gjithashtu Bolsonaron dhe djalin e tij, Eduardon, për komplot me qeverinë amerikane për të vendosur sanksione kundër zyrtarëve brazilianë, sipas dokumenteve të gjykatës. Ky veprim, tha gjykata, "do t'i sillte dobi drejtpërdrejt babait dhe financuesit të tij, Jair Messias Bolsonaro".
Duke folur jashtë stacionit të policisë të premten, Bolsonaro e quajti byzylykun elektronik në kyçin e këmbës "poshtërim të madh" dhe tha se "nuk kishte menduar kurrë të largohej nga Brazili". “Dyshimet (për largimin tim nga vendi) janë një ekzagjerim… dreqi ta marrë, unë jam një ish-president i republikës – jam 70 vjeç”, tha ai.
Bolsonaro shtoi se policia sekuestroi “rreth 14,000 dollarë amerikanë” dhe pretendoi se paratë ishin për përdorim personal, duke shtuar se ai kishte faturat për ta vërtetuar këtë.
Bastisja ndodhi ndërsa Presidenti i SHBA-së, Donald Trump, u përpoq ta detyronte homologun e tij aktual brazilian, Luiz Inácio Lula da Silva, të përfundonte gjyqin penal kundër paraardhësit të tij, duke kërcënuar me tarifa paralizuese ndaj vendit.
Trump javën e kaluar kërcënoi Brazilin me tarifa prej 50% duke filluar nga 1 gushti, sipas një letre të postuar në platformën e tij të mediave sociale, Truth Social. Në letër, Trump e lidhi kërcënimin për tarifa me atë që ai e përshkroi si një gjyq "gjueti shtrigash" kundër Bolsonaros, një aleat i ngushtë.
Gjykata Supreme e Brazilit të premten akuzoi Bolsonaron dhe djalin e tij Eduardo se kanë bashkëpunuar me SHBA-në për të vendosur tarifat. Dokumentet e gjykatës nxorën në pah një takim konfidencial që Bolsonaro pati me një zyrtar të Departamentit të Shtetit të SHBA-së dhe e nxorën në pah letrën e Trump si një “ofenduese” dhe “kërcënim të qartë” ndaj sovranitetit brazilian./ZËRI/
