MIANMAR- Numri i të vdekurve nga tërmeti i fuqishëm që goditi Mianmarin një ditë më parë ka kaluar mbi 1000 viktima, ndërkohë raportohet se të paktën 2376 kanë mbetur të plagosur.
Numri i të vdekurve në Mianmar është 1,002, tha qeveria ushtarake të shtunën, shumë më i lartë nga raportet fillestare të medias shtetërore për 144 të vdekur të premten. Të paktën nëntë persona u vranë edhe në Tajlandë, ku tërmeti me magnitudë 7.7 rihter rrëzoi një ndërtesë në kryeqytetin Bangkok, duke bllokuar 30 njerëz nën rrënoja, ndërsa janë 49 të tjerë të zhdukur.
Pas kësaj tragjedie BE ka njoftuar se do të japë 2.5 milionë euro ndihmë për Mianmarin. Po ashtu edhe Korea e Jugut do të ofrojë 2 milionë dollarë ndihmë humanitare për Mianmarin përmes organizatave ndërkombëtare si ndihmë fillestare, tha të shtunën ministria e saj e jashtme.
Tërmeti dëmtoi rrugë, ura dhe ndërtesa në Mianmar. Tërmeti me magnitudë 7,7 ballë Rihter goditi dje (28 mars) Mianmarin qendror, në një thellësi prej 10 kilometrash. Ai u pasua pak minuta më vonë nga një pasgoditje me magnitudë 6,7 ballë. Instituti gjeozizmik italian, tha se goditja kryesore ishte 300 herë më e fuqishme se ajo e Amatrice në vitin 2016./ZËRI
