SHBA- Presidenti i Shteteve të Bashkuara, Donald Trump, ka thënë se dëshiron të takohet menjëherë me presidentin e Rusisë, Vladimir Putin, për ta arritur një marrëveshje, e cila i jep fund pushtimit të plotë të Ukrainës nga Rusia. Trump është zotuar vazhdimisht se do të negociojë shpejt një zgjidhje midis Rusisë dhe Ukrainës.
“Nga ajo çfarë kam dëgjuar, Putin-i dëshiron të më takojë, dhe do ta bëjmë sa më shpejt që është e mundur. Unë do ta takoja menjëherë. Çdo ditë që nuk takohemi, ushtarët vriten në fushën e betejës”,- tha Trump.
Nga ana tjetër zëdhënësi i Kremlinit, Dmitry Peskov tha se presidenti rus pret një sinjal nga Uashingtoni se ata janë gjithashtu gati për telefonatën.
“Presidenti rus Vladimir Putin është i gatshëm të zhvillojë një telefonatë me Presidentin e SHBA-së, Donald Trump,'-tha zëdhënësi i Kremlinit, Dmitry Peskov.
Por Putin i tha një gazetari televiziv rus se çështja e negociatave me Ukrainën është e ndërlikuar nga fakti se presidenti i saj Volodymyr Zelensky ka nënshkruar një dekret që e pengon atë të zhvillojë bisedime me kreun e Kremlinit. Në fakt, ai vuri në dukje se aleatët e Zelenskyt duhet ta detyrojnë atë të anulojë vendimin që ndalon negociatat.
"Zelensky nuk po nxiton të ndjekë udhëzimet e sponsorëve të tij, ne e dimë se ka udhëzime të tilla, për të anuluar dekretin që ka nxjerrë dhe që i ndalon negociatat. Mendoj se në fund, ata që i paguajnë paratë duhet ta detyrojnë atë ta bëjë këtë”, tha Putin.
Putin e quajti Trumpin të zgjuar dhe pragmatik. Ai tha se nuk pret që presidenti amerikan të marrë vendime për sanksione përkundrejt Rusisë, që do të ndikojnë negativisht në ekonominë amerikane.
“Ai nuk është vetëm inteligjent, por edhe realist. Dhe vështirë se mund ta imagjinoj se ai do të marrë vendime që do të dëmtojnë vetë ekonominë amerikane. Prandaj, ndoshta, do të ishte më mirë që ne të takoheshim, bazuar në realitetet e sotme, të bisedonim me qetësi për të gjithë, për ato fusha me interes si për Shtetet e Bashkuara ashtu edhe për Rusinë. Ne jemi gati. Por, e përsëris, kjo varet në radhë të parë, natyrisht, nga vendimet dhe zgjedhjet e qeverisë aktuale amerikane”, tha Putin.
Presidenti rus tha gjithashtu se "kriza në Ukrainë" në vitin 2022, viti kur Kremlini nisi pushtimin, ndoshta mund të ishte shmangur nëse Donald Trump do të kishte qenë në Shtëpinë e Bardhë.
"Unë mund të pajtohem me Donald Trump se nëse ai do të kishte qenë president, nëse nuk do t'i ishte grabitur fitorja në 2020, ndoshta nuk do të kishte ndodhur kriza në Ukrainë që ndodhi në 2022", tha ai për televizionit shtetëror rus duke përsëritur pretendimet se zgjedhjet presidenciale të vitit 2020 janë “vjedhur” nga Joe Biden.
“Çfarë është tipike për ekonominë ruse dhe atë amerikane? Ne jemi jo vetëm një nga prodhuesit më të mëdhenj të burimeve energjetike, por jemi edhe konsumatorët më të mëdhenj të burimeve energjetike. Dhe kjo do të thotë se si për ekonominë tonë ashtu edhe për atë amerikane, çmimet shumë të larta janë të këqija. Sepse ne duhet të prodhojmë brenda vendit, duke përdorur burimet energjetike, duhet të prodhojmë edhe mallra të tjera brenda vendit. Dhe çmimet shumë të ulëta janë gjithashtu shumë të këqija sepse minojnë mundësitë e investimeve për kompanitë e energjisë. Ka diçka që duhet të diskutojmë këtu”, tha Putin gjithashtu për energjinë dhe kërkesën e Trump për të ulur çmimin e naftës.
Në lidhje me qëndrimin e administratës Biden për refuzimin e negociatave me Moskën, Putin tha: “Në të vërtetë, presidenti aktual i SHBA ka bërë shumë deklarata për këtë çështje. Së pari, dua të them se Rusia nuk ka refuzuar kurrë të ketë kontakte me SHBA dhe nuk kemi faj që qeveria e mëparshme refuzoi këto kontakte”.
Por, ndryshe nga deklaratat e Rusisë, Ukraina reagoi menjëherë ku tha se nuk do të ketë negociata pa pjesmarrjen e Kievit dhe të aletavë të saj të Evropës. Ishte presidenca ukrainase ajo që dha menjëherë një deklaratë për mediat pas komenteve të Putin.
"Putini dëshiron të negociojë fatin e Evropës, pa Evropën. Dhe ai dëshiron të flasë për Ukrainën pa Ukrainën. Kjo nuk do të ndodhë. Putini duhet të kthehet në realitet, përndryshe ai do të refuzohet. Kështu nuk funksionojnë gjërat në botën moderne”, tha kreu i zyrës presidenciale të Ukrainës, Andriy Yermak në Telegram.
Duke folur përmes video-lidhjes në Forumin Ekonomik Botëror në Davos të Zvicrës, Trump tha të enjten se dëshiron ta takojë Putin-in së shpejti, duke shtuar se përpjekjet e SHBA-së për ta siguruar një marrëveshje për paqe kanë filluar, por nuk dha hollësi. Gjatë fushatës presidenciale të vitit të kaluar, Trump-i thoshte vazhdimisht se do t’i jepte fund shpejt luftës dhe këtë e përsëriti edhe pak ditë para se ta merrte detyrën. Tani, ai thotë se mund të nevojiten muaj për këtë.
Ndërkohë, edhe Zelenskyy foli në Forumin Ekonomik Botëror, ku tha se nevojiten një forcë paqeruajtëse me 200.000 trupa për ta siguruar për ta garantuar çfarëdo marrëveshje armëpushimi me Rusinë në të ardhmen. Ai shtoi se një forcë e tillë paqeruajtëse do të ishte vetëm njëra nga pjesët e garancive të përgjithshme të sigurisë që do t’i nevojiteshin Kievit, në rast se fillojnë bisedimet për armëpushim me Putin-in.
Trump thuhet se i ka dhënë të dërguarit të tij në Ukrainë, Keith Kellogg, 100 ditë për të arritur një marrëveshje midis Moskës dhe Kievit. Të mërkurën, presidenti amerikan kërcënoi se do të vendosë sanksione të reja ndaj Rusisë nëse Putin refuzon të pranojë një “marrëveshje” të papërcaktuar për t’i dhënë fund konfliktit.
Më 22 janar, Trump-i, duke iu drejtuar homologut të tij rus me emër, paralajmëroi Moskën se do të përballet me tarifa, taksa dhe sanksione të reja "të larta" nëse nuk e ndalë shpejt pushtimin e plotë të Ukrainës. Një ditë më herët, ai sugjeroi se do të vendoste sanksione shtesë ndaj Rusisë, nëse Putin-i nuk do të pranonte bisedimet për paqe për t'i dhënë fund luftës. Dhe më 20 janar, në ditën e parë pas marrjes së mandatit të ri, Trump tha se Putin-i po e “shkatërron” Rusinë duke mos pranuar të bëjë një marrëveshje për t'i dhënë fund luftës.
Putini ishte ai që urdhëroi pushtimin e Ukrainës, i cili shkeli marrëveshjen e nënshkruar nga Moska dhe Kievi në vitin 1994. Me këtë marrëveshje, Rusia dhe SHBA morën së bashku garanci për sigurinë e Ukrainës në këmbim të qeverisë në Kiev që i dorëzonte Moskës armët bërthamore të epokës sovjetike që ishin ruajtur në territorin ukrainas deri në vitin 1991 dhe rënien e BRSS./ZËRI
