SHBA- Presidenti amerikan Donald Trump ka deklaruar se negociatat me Iranin në Pakistan kanë dështuar, pasi sipas tij, Teherani nuk ka pranuar të heqë dorë nga programi i armëve bërthamore. Në një postim në rrjetet sociale, Trump tha se për shumicën e pikave në bisedime ishte arritur dakordësi, por çështja e armëve bërthamore mbeti pengesa kryesore.
Ai njoftoi gjithashtu se Marina e SHBA do të ndërmarrë veprime për të bllokuar çdo anije që hyn ose del nga Ngushtica e Hormuzit, veçanërisht ato që, sipas tij, paguajnë tarifa ndaj Iranit.
Trump deklaroi se SHBA do të veprojë edhe për heqjen e minave të mundshme në zonë dhe paralajmëroi se çdo sulm ndaj anijeve amerikane ose civile do të përballet me “shkatërrim të plotë”.
“Pra, ja ku e keni, takimi shkoi mirë, shumica e pikave u ranë dakord, por e vetmja pikë që kishte vërtet rëndësi, Armët BËRTHAMORE, nuk u arrit. Me efekt të menjëhershëm, Marina e Shteteve të Bashkuara, më e mira në botë, do të fillojë procesin e BLLLOKIMIT të çdo anijeje që përpiqet të hyjë ose të dalë nga Ngushtica e Hormuzit. Në një moment, do të arrijmë në një bazë “TË GJITHË LEJOHEN TË HYJNË, TË GJITHË LEJOHEN TË DALIN”, por Irani nuk ka lejuar që kjo të ndodhë duke thënë thjesht: “Mund të ketë një minë diku atje,” për të cilën askush nuk di gjë, përveç tyre. KJO ËSHTË SHANTAZH BOTËROR, dhe udhëheqësit e vendeve, veçanërisht Shteteve të Bashkuara të Amerikës, nuk do të shantazhohen kurrë. Unë kam udhëzuar gjithashtu Marinën tonë të kërkojë dhe të ndalojë çdo anije në ujërat ndërkombëtare që ka paguar një tarifë ndaj Iranit. Askush që paguan një tarifë të paligjshme nuk do të ketë kalim të sigurt në det të hapur. Ne gjithashtu do të fillojmë të shkatërrojmë minat që iranianët kanë vendosur në ngushticë. Çdo iranian që qëllon ndaj nesh, ose ndaj anijeve paqësore, do të SHKATËRROHET PLOTËSISHT! Irani e di, më mirë se kushdo, si ta PËRFUNDOJË këtë situatë që tashmë ka shkatërruar vendin e tyre. Marina e tyre nuk ekziston më, Forcat e tyre Ajrore nuk ekzistojnë më, mbrojtja kundërajrore dhe radarët e tyre janë të padobishëm, Khomeini dhe shumica e “udhëheqësve” të tyre janë të vdekur, e gjitha për shkak të ambicies së tyre bërthamore. Bllokada do të fillojë së shpejti. Vende të tjera do të përfshihen në këtë bllokadë. Iranit nuk do t’i lejohet të përfitojë nga ky akt i paligjshëm SHANTAZHI. Ata duan para dhe, më e rëndësishmja, duan armë bërthamore. Gjithashtu dhe, në momentin e duhur, ne jemi plotësisht “GATI PËR VEPRIM,” dhe ushtria jonë do të përfundojë atë pak që ka mbetur nga Irani!”- shkruan Trump.
Deklaratat e tij vijnë në një moment tensionesh të rritura mes SHBA-së dhe Iranit, pas dështimit të raundit të fundit të negociatave./ZËRI
