SHBA- Andrew dhe Tristan Tate u larguan nga Rumania pak pas orës 5 të mëngjesit nga Rumania. Ata janë larguar me një avion privat nga aeroporti i Baneasa-s dhe janë nisur për në SHBA. E gjitha ndodhi pasi Andrew Tate (38) dhe vëllai i tij Tristan u arrestuan në Rumani tre vjet më parë ku u gjykuan me akuzat për përdhunim, trafikim të të miturve dhe pastrim parash, të cilat i kanë mohuar.
Ioan Gliga, avokati i tyre, tha se vëllezërit u larguan nga Rumania të enjten në mëngjes dhe po udhëtojnë për në Florida.
Ku ndodhen vëllezërit Tate aktualisht?
“Ata nuk kanë më masën që i ndalon të udhëtojnë. Prokurori, me kërkesë të avokatëve, ndryshoi përmbajtjen e detyrimeve të vendosura më parë,”- tha Gliga.
Vendimi i autoriteteve rumune për të hequr kufizimin e udhëtimit erdhi pasi Shtetet e Bashkuara thuhet se ushtronin presion ndaj Bukureshtit për të lehtësuar kufizimet ndaj vëllezërve Tate. Në fillim të këtij muaji, Financial Times raportoi duke cituar burime, se administrata e Donald Trump u kishte bërë presion autoriteteve rumune fillimisht me anë të një telefonate. Më pas, i dërguari special i Trumpit, Richard Grenell u takua me Ministrin e Jashtëm të Rumanisë, Emil Hurezeanu në Konferencën e Sigurisë në Mynih në Gjermani.
Hurezeanu më vonë konfirmoi se kishte diskutuar për vëllezërit Tate me zyrtarë amerikanë, por tha se nuk i ishte bërë presion për të hequr kufizimet ndaj tyre.
Por duket se largimi i vëllezërve Tate nga Rumania është i përkohshëm. Avokati i tha CNN se vëllezërit Tate do të kthehen në Rumani në më pak se një muaj për paraqitjen e tyre të ardhshme në gjykatë më 24 mars. Megjithatë, një avokat britanik që përfaqëson viktimat e supozuara të vëllezërve Tate pohoi se, tani ata janë lejuar të largohen nga vendi, nuk përjashtohet mundësia që të mos kthehen më kurrë në Europë.
Vëllezërit Tate, të dy ish-boksierë profesionistë, u arrestuan për herë të parë në dhjetor të vitit 2022 dhe mbetën në paraburgim deri në prill të vitit 2023, para se të vendosen në arrest shtëpie. Tate u bë i famshëm në internet në vitet e fundit, duke grumbulluar miliarda shikime në TikTok me fjalime në lidhje me dominimin mashkullor, nënshtrimin femëror dhe krijimin e pasurisë./ZËRI
