TIRANË- Banka e Shqipërisë ka shtyrë deri në fund të muajit qershor 2024 pezullimin e aktivitetit të institucionit financiar jobankë të kredidhënies Micro Credit Albania.
Me anë të një vendimi të marrë në muajin shkurt, Guvernatori, Gent Sejko, ka vendosur pezullimin e ushtrimit të veprimtarisë së kredidhënies (përfshirë këtu edhe blerjen e kredive të reja, apo ristrukturimin e atyre ekzistuese), për të cilën është licencuar subjekti në fjalë.
Gjatë kësaj periudhe, subjektit Micro Credit Albania i lejohet vetëm të shesë portofolin e kredive tek palë të treta, të licencuara nga Banka e Shqipërisë për të ushtruar këtë aktivitet, si edhe të reflektojë menjëherë në ulje të detyrimit të klientit çdo pagesë të detyrimit nga ana e tij duke bërë dhe përditësimet përkatëse në Regjistrin e Kredive.
Në periudhën nëntor-dhjetor 2023, Departamenti i Mbikëqyrjes në Bankën e Shqipërisë kreu një ekzaminim të plotë të këtij subjekti, me qëllim vlerësimin e situatës pas masës së pezullimit 1-vjeçar të aktivitetit, që ishte vendosur në janar të vitit 2023. Ekzaminimi evidentoi se gjatë periudhës njëvjeçare, subjekti nuk ka blerë apo nuk ka aprovuar kredi të reja, por është angazhuar në rikuperimin e portofolit ekzistues.
Gjatë kësaj kohe, janë adresuar vetëm një pjesë e vogël e rekomandimeve të ekzaminimeve të mëparshme, ndërkohë që janë evidentuar përsëri shkelje të kërkesave rregullatore. Ndër më kryesoret, Departamenti i Mbikëqyrjes ka vlerësuar dhënien e informacionit të pasaktë dhe jo të plotë në raportime periodike, në regjistrin e kredive dhe gjatë ekzaminimit në vend, paraqitjen e pasaktë të gjendjes financiare, mosklasifikimin e klientëve sipas kërkesave rregullatore për rrezikun e kredisë, mangësi të elementeve të transparencës gjatë plotësimit të akt-marrëveshjeve me klientët, etj.
Për këto arsye, Guvernatori Sejko ka pranuar propozimin e Departamentit të Mbikëqyrjes për shtyrjen e afatit të pezullimit të licencës për subjektin në fjalë.
Banka e Shqipërisë pezulloi për herë të parë licencën e Micro Credit Albania në janar të vitit të kaluar, pasi vlerësoi se subjekti në fjalë kishte vepruar në shkelje të kërkesave rregullatore për një kohë të gjatë, në mënyrë të vetëdijshme dhe duke favorizuar palët e lidhura, më konkretisht institucionin tjetër financiar, Final.
Problemet në këtë institucion financiar e kanë origjinën qysh në muajin korrik 2020, kur pranë subjektit u evidentuan shkelje serioze të kërkesave rregullative mbikëqyrëse. Pasi subjekti u njoftua për fillimin e procedurës së masave administrative, në korrespondenca dhe takime të njëpasnjëshme me Departamentin e Mbikëqyrjes në Bankën e Shqipërisë, ai prezantoi një sërë masash të menjëhershme për korrigjimin e situatës.
Duke vlerësuar reagimin e shpejtë të subjektit dhe situatën financiare të tij (subjekti krijoi provigjonet e munguara dhe vijoi të ruante një nivel të kënaqshëm kapitali, në përputhje me licencën e marrë), procedura e masave administrative u ndërpre në 20 prill 2021.
Por, në shtator 2022, Departamenti i Mbikëqyrjes zhvilloi një ekzaminim të pjesshëm pranë subjektit Micro Credit Albania, me objektiv ndjekjen e zbatimit të rekomandimeve të lëna pas ekzaminimit të plotë të kryer në korrik 2020. Nga ky ekzaminim ka rezultuar se rekomandimet e lëna janë realizuar vetëm pjesërisht nga subjekti, ndërsa inspektimi i fundit ka evidentuar shkelje serioze.
Subjekti nuk i kishte klasifikuar kreditë në përputhje me rregulloren “Për administrimin e rrezikut në veprimtarinë e subjekteve jobanka”. Sipas inspektimit, subjekti nuk ka kryer një analizë të plotë financiare mbi aftësinë paguese të klientëve të përmendur më sipër, por është bazuar në vetdeklarime të paverifikuara.
Një shkelje tjetër serioze ishte mosreflektimi në kontratat e kredive të detyrimit për kufizimin e penaliteteve në masën 30% të detyrimit kontraktor, sipas ndryshimeve të rregullores “Për kredinë konsumatore dhe kredinë hipotekore”, që hynë në fuqi në fillim të vitit 2022.
Subjekti nuk dispononte as një bazë me të dhëna të plota dhe të përditësuara të të gjithë klientëve, në shkelje të rregullores “Për parandalimin e pastrimit të parave dhe financimit të terrorizmit”.
Përveç faktit që shkeljet janë shtrirë në një kohë të gjatë dhe janë kryer me vetëdije, Banka e Shqipërisë argumentoi se subjekti kishte paraqitur përpara autoritetit mbikëqyrës një situatë joreale të cilësisë së portofolit të kredisë dhe nuk kishte respektuar kërkesat rregullatore lidhur me kufizimin e masës së penaliteteve. /Monitor
