TIRANË- Ish-Prefektja e Fierit Rajmonda Balilaj ka mbërritur këtë të hënë në Prokurorinë e Posaçme Kundër Korrupsionit dhe Krimit të Organizuar (SPAK). Siç shihet dhe në pamjet e siguruara nga ZËRI, Balilaj shihet jashtë derës së SPAK, ndërsa nga lëvizjet shihet se është e tensionuar. Ndërkohë pas daljes nga SPAK ajo tha se nuk ka qenë në Shqipëri në momentin që SPAK e ka pezulluar nga detyra. Ndërsa shtoi se nuk ka pasur shkelje të barazisë në tendera.
Rajmonda Balili: Nuk e kam parë. Më duhet ta lexoj materialin.
Pyetje: ‘’Genti 001’’ ka marrë pjesë në 32 procedura?
Rajmonda Bilali: S’i kam numëruar, por dhe nëse është çfarë problemi ka, blerje baze materiale. Ato ka dokumente që e vërtetojnë. Ska arsye pse të ketë pabarazi në tendera. Nuk ka qenë në Shqipëri. Jam thirrur si person i marrë në pyetje. Më vjen keq nuk jam darkort.
Rajmonda Balilaj, Prefektja e qarkut të Fierit prej tre muajsh dhe gjashtë zyrtarë të Bashkisë Patos, janë pezulluar nga detyra pasi akuzohen për shkelje të barazisë së pjesëmarrësve në tendera apo ankande publike. Sipas SPAK, të gjithë kanë konsumuar elementët e veprës penale “Shkelja e barazisë së pjesëmarrësve në tendera apo ankande publike”. Bëhet fjalë për dy procedura prokurimi të organizuara në vitin 2021, nga Bashkia Patos, si Autoritet Kontraktor, njëri për ndërtim emergjent të një muri mbajtës në rrugën Dukas-Breg, me fond 6.7 mln lekë dhe tjetri për ndërtim emergjent të murit mbajtës në trupin e rrugës në fshatin Ruzhdie, me fond 8 mln lekë. Balilaj, më detyrë ish-Kryetare e Bashkisë Patos, në bashkëpunim me anëtarët e KVO-së, sekretarin e përgjithshëm, Shkelqim Beqiri dhe Eneriada Rizai, anëtare e Komisionit të Vlerësimit të Ofertave, kanë favorizuar në kundërshtim me ligjin dhe shpallur fitues operatorin ekonomik “Genti 001”.
Sipas SPAK, Balilaj ka paracaktuar fituesin, operatorin “Genti 001”, me pronar Ilir Dervishajn, duke dalë në “Apollon TV” dhe informuar fillimin e punimeve për këtë rrugë, në datën 06.02.2021, në një kohë kur shpallja e fituesit është bërë në datën 15.02.2021, dhe lidhja e kontratës me autoritetin kontraktor është bërë në datën 16.02.2021. Ish-Kryetarja e Bashkisë, ka bashkëpunuar me anëtarët e KVO-së të caktuar prej saj, në urdhërin përkatës, pasi ajo nuk kishte nga ta dinte se ky operator do të kualifikohej si fitues edhe pse ishte i vetmi garues, pasi nga hetimi ka rezultuar se ky operator nuk i plotësonte të gjitha kriteret dhe dokumentacionin e për rrjedhojë duhej skualifikuar. Kompania në fjalë, sipas SPAK, për tre vite rresht është shpallur fituese në 32 procedura prokurimi të organizuara nga Bashkia Patos. Administrator dhe pronar i kësaj kompanie është Ilir Dervishaj. Kompania “Genti 001” është themeluar në vitin 2019 dhe operon në fushën e ndërtimit dhe të tregtimit me shumicë e pakicë të materialeve të ndërtimit e lavazho./ZËRI
