TIRANË- Policia e Sarandës ka dalë me një njoftim në lidhje me vdekjen e biznesmenit Armando Nelaj, i cili ndërroi jetë në det pak ditë më parë. Pasi dje Policia e Sarandës zbuloi emrin e biznesmenit, i cili kishte mbetur i paidentifikuar që kur ndodhi shpërthimi, sot është bërë me dije se të gjithë materialet janë referuar në Prokurori për të hetuar rastin. Kjo pasi ka dyshime që biznesmeni Nelaj të mos ketë ndërruar jetë si pasojë e shpërthimit të bombulës së oksigjenit teksa zhytej, por mund të kemi të bëjmë me një vrasje. Megjithatë do të jetë ekspertiza ajo që do të provojë dinaminë e ngjarjes.
Viktima i veshur si polumbar, ishte zhytur 100 metër larg portit të qytetit në momentin që dyshohet se i shpërtheu bombula e oksigjenit. Trupi i tij i gjymtuar u nxorr në breg nga dy turistë që kaluan në zonë me gomone. Identifikimi i tij u bë i mundur nga i vëllai i viktimës, i cili e ka njohur nga tatuazhi që kishte në qafë.
Drejtoria Vendore e Policisë Vlorë
Në vijim të informacionit paraprak të dhënë më datë 24.06.2024, informojmë se Komisariati i Policisë Sarandë referoi materialet në Prokurori, pasi në afërsi të Portit Detar Sarandë, dyshohet se ka humbur jetën si pasojë e një shpërthimi, ndërkohë që notonte në det, pranë gomones së tij, shtetasi A. N., 52 vjeç, banues në Sarandë. Në vijim, pritet akti i ekspertimit per arsyen e shperthimit. Ndërkohë, në drejtimin e Prokurorisë, vijon puna për zbardhjen dhe dokumentimin e plotë ligjor të rrethanave të ngjarjes.
52-vjeçari prej 13 vitesh operonte si sipërmarrës ndërtimi në Sarandë, por nuk raportohet si person që ka pasur probleme me ligjin./ZËRI
