TIRANË- Struktura e Posaçme kundër Korrupsionit dhe Krimit të Organizuar ka kërkuar kthimin në burg të ish-kryebashkiakut të Durrësit, Vangjush Dako. Kjo kërkesë e organit të akuzës është shqyrtuar sot në Gjykatën e Apelit të Posaçëm. Në sallë, prokurori i çështjes kërkoi të rivendosej masa e sigurisë "arrest me burg" për Vangjush Dako.
Por avokatët mbrojtës të Dakos kanë përmendur afatet, që sipas tyre kanë "skaduar" edhe për masën e arrestit në shtëpi. Megjithatë vendimi i mbeti trupës së Gjykatës së Apelit. Në seancën e sotme, Gjykata e Posaçme e Apelit ka lënë në fuqi masën "arrest shtëpie" për ish-kryebashkiakun, duke lënë në fuqi vendimin e 27 shkurtit.
Ish-kryebashkiaku i Durrësit Vangjush Dako u arrestua me urdhër të SPAK më datë 6 qershor 2023. Në pranga, përpos tij, u vunë edhe 8 ish-zyrtarë në Bashkinë e Durrësit dhe një ndërtues. Por u lirua me masën "arrest shtëpie" më 27 shkurt. Ndaj Dakos rëndon akuza e shpërdorimit të detyrës në dy raste. Njëra akuzë është për lejen e ndërtimit e dhënë përpara 11 vitesh dhe tjetra për një tender të vitit 2014-2015, për ndërtimin e një shëtitoreje në zonën bregdetare, që i ka shkaktuar buxhetit të shtetit një dëm 18 milionë lekë./ZËRI
