DURRËS- Një apartament në katin e 10- të të një pallati në lagjen nr 4 të Durrësit, ka shpërthyer në flakë në orët e vona të mbrëmjes së djeshme.
Flakët kanë shkrumbuar plotësisht katin e 10-të të ndërtesës duke shkaktuar dëme të shumta materiale.
Fatmirësisht nuk pati të lënduar në njerëz pasi banorët u evakuuan menjëherë sapo ra zjarri rreth orës 23:30.
Shkaqet e zjarrit ende nuk dihen ndërsa grupi hetimor ndodhet në vendngjarje.
Ky është rasti i dytë që një pallat përfshihet nga flakët brenda pak ditësh. Një pallat, po në katin e 10-të u përfshi nga flakët në Tiranë duke shkrumbuar disa apartamente.
Fatmirësisht në Durrës flakët kanë arritur që të neutralizohen në kohë.
Njoftimi i policisë:
Rreth orës 23:30, në lagjen nr. 4, pranë stacionit të trenit ra zjarr në katin e 10 të një pallati. Në vendngjarje shkuan menjëherë shërbimet e Policisë dhe zjarrfikëset.
Shërbimet e Policisë evakuan menjëherë banorët dhe nga zjarri nuk pati asnjë të lënduar. Zjarrfikësit bënë të mundur fikjen e zjarrit.
Grupi hetimor po punon për sqarimin e rrethanave dhe shkaut të rënies së zjarrit.
