LUSHNJE- Një aksident i rëndë është regjistruar pasditën e kësaj të premteje në aksin rrugor Lushnje-Fier. Raportohet se dy makina janë përplasur me njëra-tjetrën e për pasojë katër persona kanë mbetur të plagosur, mes tyre dy fëmijë.
Siç mund të shihet dhe në pamje makina tip “Volswagen” është përplasur me trafikndarësen ndërsa makina tip “Peugeot” ka dalë jashtë rruge. Të plagosurit janë nisur për në spitalin e Fierit ku ndodhen nën kujdesin e mjekëve.
Sipas Policisë shkak për aksidentin dyshohet të jetë bërë mosrespektimi i rregullave të qarkullimit rrugor. Një nga drejtuesit ka dashur të kthehet për në Savër, por është përplasur nga mjeti tjetër që vinte nga e njëjta korsi.
Një nga shoferët është Bilbil Zeqo, i cili kishte në automjet tre nxënës, nipërit e tij, të cilët po i dërgonte në shtëpi, kur është goditur në anën e derës nga mjeti tjetër që drejtohej nga Oliks Stefanaj nga Berati i cili ishte me të fejuarën e tij, një shtetase italiane.
Policia ka nisur hetimet për zbardhjen e plotë të rrethanave të aksidentit. Ky aks është një “njollë e zezë” sa i përket aksidenteve me pasoja fatale. Vetëm pak metra larg vendit të aksidentit janë vendosur buqeta me lule, nga familjarët e viktimave që kanë humbur jetën në aksidente./Zëri.ai
