VLORË- Një 46-vjeçar është vënë në pranga pasi ka kanosur me armë gjahu (çifte), bashkëshorten e tij dhe dy vajzat e tyre. Në njoftimin e policisë bëhet me dije se pas marrjes së njoftimit, forcat “Shqiponja” kanë shkuar në lagjen “15 Tetori” dhe kanë parandaluar krimin në familje, duke vënë në pranga 46-vjeçarin. Përpara se të mbërrinin forcat e policisë, ai tentoi të largohej me motoçikletë. Çiftja dhe motoçikleta janë sekuestruar, ndërsa gruaja e dy vajzat po merren në pyetje.
Njoftimi i policisë Vlorë: Finalizohet operacioni policor i koduar “Fast”, për parandalimin e një ngjarjeje të mundshme kriminale, në familje. Kanosi për jetën, me armë gjahu (çifte), bashkëshorten e tij dhe dy vajzat e tyre, kapet në flagrancë nga shërbimet e Forcës së Posaçme “Shqiponja”, në tentativë për t’u larguar me motoçikletë, 46-vjeçari. Sekuestrohen arma e gjahut (çifte) dhe motoçikleta. Pas marrjes së njoftimit, mbrëmjen e sotme, se një shtetas po kanoste për jetën, me armë gjahu çifte, bashkëshorten e tij dhe dy vajzat e tyre, në banesë, në lagjen “15 Tetori”, shërbimet e Forcës së Posaçme “Shqiponjat” dhe të Komisariatit të Policisë Vlorë menjëherë kanë organizuar punën për parandalimin e ngjarjes së mundshme kriminale, dokumentimin e plotë ligjor të rastit dhe vënien e autorit përpara përgjegjësisë penale. Si rezultat i veprimeve të shpejta nga Policia, është kapur në flagrancë në tentativë për t’u larguar me një motoçikletë, shtetasi Sh. Xh., 46 vjeç. Gjithashtu, janë sekuestruar në cilësinë e provës materiale, arma e gjahut çifte me të cilën 46-vjeçari kanosi familjarët, si dhe motoçikleta me të cilën tentoi të largohej. Ndërkohë, vijon puna e grupit hetimor, për sqarimin e plotë të rrethanave të ngjarjes dhe për referimin e materialeve procedurale në Prokurori.
