TIRANË- Gjatë 72 orëve të fundit, policia rrugore ka zhvilluar kontrolle të përqëndruasa në hyrje-daljet e autostradave dhe rrugëve interurbane për të rritur sigurinë në trafik dhe për të garantuar respektimin e rregullave të qarkullimit. Blutë bëjnë me dije se gjatë kontrolleve janë evidentuar dhe ndëshkuar drejtues që krijonin pengesa në qarkullim duke mos respektuar radhën, sidomos tek rrethrrotullimi i Selitës dhe ai te Liqeni i Thatë, ku u vendosën 59 masa administrative. masa janë marrë edhe për shoferët që po kryenin parakalime të gabuara, me fushëpamje të kufizuara, në Rrugën e Arbrit.
Njoftimi:
Policia Rrugore/ Specialistët e Seksionit të Trafikut Interurban, gjatë 72 orëve të fundit, kanë zhvilluar kontrolle të përqendruara në hyrje-daljet e autostradave dhe rrugëve interurbane, për të garantuar respektimin e rregullave të qarkullimit dhe rritjen e sigurisë në trafik.
Gjatë këtyre kontrolleve, u evidentuan dhe u ndërmorën masa ndaj drejtuesve të automjeteve që:
-hynin pa respektuar radhën dhe krijonin pengesa në qarkullim, kryesisht tek rrethrrotullimi i Selitës dhe rrethrrotullimi te Liqeni i Thatë. Për këto shkelje u vunë 59 masa administrative;
-kryen parakalime të gabuara, me fushëpamje të kufizuara, në Rrugën e Arbrit;
-parkuan në mënyrë të parregullt. Njëri prej këtyre automjeteve rezultoi debitor me 40 masa administrative. Mjetet e parkuara u spostuan me mjet ngritës.
Kontrollet e ndërmarra synojnë disiplinimin e drejtuesve të mjeteve, parandalimin e aksidenteve dhe krijimin e një qarkullimi të rregullt dhe të sigurt në rrugët e Tiranës.
Policia e Tiranës ju bën thirrje të respektoni rregullat e qarkullimit rrugor, të qendroni në rradhë, të mos parakaloni në mënyrë të gabuar dhe të parkoni në mënyrë të rregullt. Bashkëpunimi juaj është i domosdoshëm për të parandaluar aksidentet dhe për të garantuar sigurinë e të gjithëve.
