TIRANË- Ministria e Brendshme kërkon zyrtarisht që tullumbacja me azot të konsiderohet lëndë psikotrope. Kështu, MB ka dërguar paraditen e sotme në Kuvendin e Shqipërisë depozitimin e kërkesës për Komisionin e Shëndetësisë, që azoti i tullumbaceve të shpallet lëndë psikotrope.
Ministria shprehet se pas raportimit të disa aksioneve të policisë lidhur me këtë lëndë, konstatohet një shqetësim për përdorimin e tullumbacës me azot nga të rinjtë.
Në relacion, ministria thekson se edhe ekspertët deklarojnë se këta lëndë sjellin “probleme shëndetësore, përfshirë të natyrës neurologjike”.
Ministria e Brendshme, në dokument, vlerëson se duke qenë se këto lëndë nuk klasifikohen aktualisht si lëndë narkotike apo psikotrope të ndaluara, sipas legjislacionit në fuqi, lind nevoja emergjente për përfshirjen e tyre në listën përkatëse që i bashkëlidhet ligjit nr. 7975 datë 26.7.1995 “Per barnat narkotike dhe lëndët psikotrope”, i ndryshuar.
“Krahas gazit N20, kërkojmë nga Komisioni i Shëndetësisë të merret në konsideratë edhe përfshirja në listën e lëndëve narkotikeve apo psikotrope të ndaluara edhe të te gjitha substancave te reja narkotike, të identifikuara dhe propozuara, në kohë të ndryshme nga Instituti i Policisë Shkencore, të cilat mund t’ua vendosim në dispozicion sipas kërkesës Tuaj.
Sa më sipër, Ministria e Brendshme, edhe në rolin e institucionit udhëheqës për negociatat për Kapitullin 24, vlerëson se mbështetja nga ana Juaj e këtij propozimi është në përputhje edhe me rekomandimet e lëna në kuadër të Takimit të 13-të të Nënkomitetit të Bashkimit Evropian -Shqipëri “Drejtësia, liria dhe siguria” dhe konkretisht: “Shqipëria duhet të ndryshojë ligjin për barnat narkotike dhe lëndët psikotrope për të përditësuar listën e substancave psikotrope ndaluara, në mënyrë që të sigurojë një kuadër të përshtatshëm ligjor për hetimet”, shkruhet në propozimin e Ministrisë së Brendshme.
Ministri i Brendshëm Taulant Balla deklaroi pak ditë më parë në parlament se tullumbacja me azot është ‘lëndë e rrezikshme’ dhe do të ketë një konsultim me ekspertë të fushës, për të bërë klasifikimin e saj./Zëri.ai/
