TIRANË- Epidemia e gripit ka arritur një tjetër nivel në vendin tonë. Pas kulmit të infektimeve në mesin e muajit janar, AH1N1 javën e dytë të shkurtit shënon vlerat më të larta deri tani. Mbi 17.700 njerëz janë konfirmuar si të sëmurë nga gripi dhe infeksionet e tjera respiratore vetëm në këtë javë. Tirana mban vendin e parë për numrin e infektimeve, ndjekur nga Gjirokastra dhe Lezha. Kryeqyteti është kthyer në vatër të infeksionit të fruthit. Nga 22 fëmijë të prekur zyrtarisht me fruth, pjesa më e madhe e tyre janë në Tiranë, që është edhe qyteti me nivelin më të ulët të vaksinimit në rang kombëtar. Drejtoresha e Institutit të Shëndetit Publik Eugena Tomoini ka deklaruar se në vendin tonë ka edhe raste të zgjebës, por që nuk ka shpërthim masiv epidemiologjik.
