KORÇË – Molla në Zvirinë, që ka mbetur stok, ka detyruar fermerët që të dalin në protestë gjatë mëngjesit të sotëm. Dhjetëra fermerë kanë dalë në kryqëzimin e fshatit Zvirinë, në aksin nacional që lidh Korçën me Pogradecin.
Fermerët në Zvirinë shprehen se molla e tyre ka mbetur pa shitur, për shkak të hyrjes në vendin tonë të mollës së importit, kryesisht nga Serbia. Në këtë protestë, e lajmëruar më herët, ka edhe forca të policisë, që janë pozicionuar në këtë aks rrugor, për të kontrolluar situatën.
-
-
-
Protestë në Fier/ Blegtorët bllokojnë rrugën në Levan-Vlorë
23 Janar, 10:01 -
-
Jo pak, por rreth 15 ton mollë kanë mbetur pa shitur, në frigoriferët e juglindjes së vendit. Shkak për situatën, sipas grumbulluesve të mëdhenj, është grumbullimi i bërë me çmim të lartë në sezon dhe hyrja e mollës nga importi.
Kujtojmë se një sërë protestash janë mbajtur në vendin tonë, kryesisht në jug, nga fermerët dhe blegtorët. Qindra blegtorë në Vlorë protestuan për çmimin e qumështit. Ata u shprehën se çmimi nuk i mbulon kostot e shpenzimeve të tyre e as nuk justifikon punën e bërë.
Ndërsa, blegtorët nga Tepelena, Përmeti, Saranda, Delvina, Gjirokastra, u mblodhën në urën e Kardhiqit për të zhvilluar protestë. Ata thanë se ulja e çmimit ka sjellë një krizë të thellë financiare për blegtoret, duke i detyruar disa prej tyre të mbyllin bizneset e tyre.
Protëstë nga fermerët u zhvillua edhe në Fier. Ata kanë bllokuar rrugën në Levan-Vlorë. Blegtorët u shprehën se fabrikat e përpunimit të qumështit kërkojnë t'ua marrin atë me çmimin më të ulët dhe e kundërshtojnë.
Ndërkaq, disa ditë më parë, dhjetëra blegtorë të rretheve të jugut kanë bllokuar sërish rrugën nacionale që lidh Kardhiqin me Delvinën. Ata kanë protestuar në hyrje të aksit nacional, tek Ura e Kardhiqit. Protestuesit kanë përsëritur kërkesat e tyre, duke u shprehur se sektori ka problematika të shumta, që lidhen me çmimet e produkteve blegtorale, subvencionet që nuk mjaftojnë, kufizimi i kullotave dhe kërkesat që kanë të bëjnë me kontratat e shitjes së mishit. Blegtorët thanë se situata po kërcënon mbijetesën e sektorit dhe të industrisë ushqimore në vendin tonë./ZËRI/
