TIRANË- Qytetarët në rajonin e Ballkanit Perëndimor kanë vendosur që të ngrenë zërin, përveçse në Shqipëri. Të zemëruar nga rritja e çmimeve, qytetarë të disa vendeve të Ballkanit Perëndimor u ftuan që të bojkotojnë blerjet në disa dyqane ushqimore. Të parët që nisën gjithçka ishin kroatët. Më 24 janar, qytetarët nuk blenë në markete dhe shitjet në të gjithë vendin ranë më 50%.
Nisma të ngjashme u mbajtën edhe në Serbi, Maqedoni të Veriut, në Mal të Zi, në Bosnje e Hercegovinë dhe në Slloveni. Së fundmi, e njëjta thirrje është bërë edhe për qytetarët në Kosovë, të cilëve u është kërkuar që të bojkotojnë marktet për shkak të çmimeve të larta. Në të gjitha rrjetet sociale është shpërndarë një poster me mbishkrimin: Kosova bojkoton, 1-7 shkurt!
Në foton e shpërndara në rrjetet sociale bëhet thirrje të bojkotohen supermarketet e mëdha si: Viva Fresh Store, Meridian, ETC, Spar, Super Viva e Interex. Edhe në Kosovë, protesta ka të njëjtin qëllim, që të ulë çmimet e ushqimeve. Por deri më tani duket se nuk do të ketë asnjë ndikim, sidomos në kushtet që për pak javë Kosova ka zgjedhje. Qeveria aktuale në ikje nuk mund të bëjë asnjë lëvizje për të ndërhyrë në rregullimin e çmimeve, por bojkoti i qytetarëve mund të "zgjojë" ndërgjegjësimin e supermarketeve për atë që u ofrojnë blerësve.
Mirëpo, kjo nismë që ka përfshirë gjithë rajonin e Ballkanit Perëndimor, nuk e ka "prekur" Shqipërinë. Kjo pavarësisht sesa shpenzojnë shqiptarët për të vendosur ushqim në tavolinat e tyre. Sipas një raporti të fundit të publikuar nga “Numbeo”, një databazë globale që mat kostot e jetesës në qytete të ndryshme të botës, Tirana është renditur në vendin e 92-të nga 141 qytete europiane për kostot e jetesës.
Indeksi i këtij viti konfirmon se Tirana është kryeqyteti më i shtrenjtë në Ballkan, duke lënë pas Beogradin, Shkupin, Sarajevën, Podgoricën dhe madje edhe disa kryeqytete europiane si Sofja, Bukureshti dhe Budapesti. Por sërish, në vendin tonë nuk është parë nevoja për të ngritur zërin dhe të kërkuar çmime me të ulëta. Edhe pse shifrat flasin vetë.
Por sa harxhojnë shqiptarët për t'u ushqyer?
Raporti tregon se kostot e jetesës në Tiranë janë sa 41.9% e atyre në Nju Jork. Në krahasim, Beogradi ka një indeks prej 39.4%, Podgorica 35%, Sarajeva 33.5%, Shkupi 31.7% dhe Prishtina 25.3%. Indeksi përfshin shpenzimet për qira, produkte ushqimore, çmimet në restorante dhe fuqinë blerëse lokale. Nga i njëjti sondazh, çmimet e larta të produkteve ushqimore mbeten shkaku kryesor i kostove të larta të jetesës në Tiranë. Sipas raportit, një banor i Tiranës shpenzon mesatarisht 42.5% të shumës që një banor i Nju Jorkut përdor për ushqime.
Kjo përqindje është ndër më të lartat në rajon dhe Europë.
Megjithatë duket se deri tani, gjithçka është e përballueshme./ZËRI
