MAJORKA-Një 27-vjeçar pësoi një aksident tragjik ndërsa ishte me pushime në Majorka, i cili rezultoi në thyerjen e 4 pjesëve të shtyllës kurrizore. Mediat spanjolle raportuan aksidentin tragjik, ku 27-vjeçari u plagos rëndë të hënën (15 qershor) në gjirin Caló des Moro në komunën e Santanyí-t.
Aksidenti, ndodhi rreth orës 12:30 të pasdites. Me të marrë alarmin, SAMU 061 dërgoi menjëherë një ambulancë të avancuar për mbështetjen e jetës dhe një tjetër me një ekip infermierësh në vendngjarje. Operacioni i shpëtimit kërkoi ndërhyrjen e helikopterit “Milana” të Shërbimit të Zjarrfikësve të Këshillit të Mallorcës.
I riu ra nga afërsisht pesë deri në shtatë metra në një zonë shkëmbore. Shërbimet e urgjencës e trajtuan atë në vendngjarje përpara se të transportohej me helikopter nga zjarrfikësit e Milanës në Spitalin Son Espases në Palma. Kushërinjtë e tij, Ingrid dhe Denny, kanë nisur një apel për mbledhjen e fondeve. Në "Gofoundme" e hapur, të afërmit e të riut shprehen se paratë synojnë të ndihmojnë familjen të mbulojë shpenzimet mjekësore, shpenzimet e udhëtimit dhe kujdesin e vazhdueshëm.
Të afërmit e tij, njoftojnë se Ardi ndodhet aktualisht në gjendje kritike në terapi intensive (ICU), i intubuar dhe plotësisht i paralizuar. 27-vjeçari shqiptar ka pësuar dëmtime shumë të rënda në shtyllën kurrizore dhe vertebrat e qafës dhe gjendja e tij mbetet e paqëndrueshme.
