ROMË- 22-vjeçarja shqiptare Ilaria Sula prej datës 25 mars rezultonte e zhdukur dhe askush nuk kishte asnjë lajm për të. E reja ishte larguar nga banesa në orën 21:00, dhe nuk ishte përshëndetur me shoqet e saj, kjo ishte hera e fundit që të afërmit dhe shoqëria do të kishin kontakt me të. Sula, shkoi në lagjen Afrikano të Romës, ku jetonte ish- i dashuri i saj nga Filipinet, 23-vjeçari Mark Samson, i cili e vrau. Ishin të dhënat e telefonit të saj, që zbardhën ngjarjen e rëndë dhe se çfarë ndodhi me studenten e Universitetit të Romës “La Sapienza”.
Nëna e viktimës hodhi dyshimet rreth zhdukjes së saj, pasi e bija e ndjerë e telefononte gjithmonë me video, dhe nuk shkruante mesazhe.
"Menjëherë e kuptova se diçka nuk shkonte. Më pas fola me miqtë që jetonin me të dhe së bashku me bashkëshortin vendosëm të denoncojmë menjëherë zhdukjen e saj, falë edhe inspektorit Moreno Fernandez që më rekomandoi një mik nga Terni. E di që hetimet çuan menjëherë te djali me të cilin Ilaria kishte dalë në të kaluarën, por ne dimë pak për të”, ka thënë nëna.
Ndërkohë vëllai 20-vjeçar i të ndjerës, ka treguar se motra dukej e qetë dhe se nuk i kishte treguar për asnjë problem. Për ish të dashurin që e vrau, i vëllai thotë se e njihte.
“Me Ilaria-n fola për herë të fundit dy javë më parë, sepse ajo erdhi të na vizitojë në Terni. Ajo ishte e qetë dhe nuk më tregoi për asnjë problem, pastaj vetëm mesazhe, por nuk jam e sigurt që i kishte shkruar. E njihja, ishin bashkë prej një viti, por ishin ndarë prej kohësh", ka rrëfyer 20-vjeçari.
Menjëherë pas kësaj, hetuesit analizuan të dhënat e telefonit, antenat e celularëve dhe tabulatet. Ish- i dashuri i saj e kishte goditur disa herë me thikë dhe më pas trupin e saj e kishte futur në një valixhe dhe e kishte hedhur në humnerë. Por, pasi kreu vrasjen Samson vazhdoi të përdorte celularin e viktimës dhe të postonte në rrjetet sociale të saj dhe duke iu përgjigjur mesazheve të të afërmëve që po e kërkonin. 23-vjeçari e futi valixhen në makinë dhe më pas shkoi në një zonë të pyllëzuar, aty ku e hodhi valixhen në një greminë në zonën e Poli-t, pothuajse 40 km larg Romës. Pikërisht aty, policia gjeti trupin e vajzës, ndërsa ish-i dashuri u shoqërua fillimisht në komisariat dhe më pas në prokurori, ku përfundimisht pranoi krimin./ZËRI
