KAKAVIJË- Dy persona u arrestuan nga Policia Kufitare e Kakavijës, pasi tentuan të trafikonin drogë në Greqi. Në pranga kanë rënë Osman Kamberaj, 44 vjeç dhe Enkelejda Xhemali, të dy nga Fieri, pasi tentuan të kalonin në kufi 63 kilogramë kanabis. Gjatë kontrollit të Policisë, atyre iu gjetën në makinë 60 pako me kanabis të fshehra në parafangot dhe shasinë e makinës.
Policia sekuestroi 1890 euro, tre celularë dhe makinën e përdorur për të transportuar drogën. Po vijojnë hetimet për të identifikuar persona të tjerë të përfshirë në këtë aktivitet kriminal.
“Policia Kufitare e Kakavijës ka finalizuar operacionin e koduar “Modifikimi”, duke goditur një rast të tentativës për trafikim të lëndëve narkotike drejt Greqisë.
Gjatë kontrolleve intensive me teknologji dhe qen antidrogë, në një automjet u gjetën 60 pako me kanabis sativa, me peshë totale 63.2 kilogramë, të fshehura në parafangot dhe shasinë e mjetit.
Si rezultat, u arrestuan në flagrancë shoferi O. K., 44 vjeç, dhe pasagjerja E. Xh., 45 vjeçe, të dy banues në Fier.
Policia sekuestroi gjithashtu 1890 euro, tre celularë dhe automjetin e përdorur për trafikimin e drogës.
Hetimet vijojnë për të identifikuar persona të tjerë të përfshirë në këtë aktivitet kriminal. Materialet procedurale i kaluan Prokurorisë së Gjirokastrës për veprime të mëtejshme”, njofton Policia./ZËRI
