SHBA- Presidenti amerikan Donald Trump shpalli të mërkurën e 2 prillit një paketë të re tarifash tregtare në atë që e cilësoi “Dita e Çlirimit”, një përpjekje e re për të rivendosur balancën tregtare të Shteteve të Bashkuara me pjesën tjetër të botës.
Trump njoftoi vendosjen e një tarife bazë prej 10% mbi të gjitha mallrat e importuara, përfshirë ato që vijnë nga vende si Shqipëria, të cilat nuk janë pjesë e ndonjë marrëveshjeje të veçantë tregtare me SHBA-në. Në listën e gjatë me më shumë se 60 vende të cilat do të tarifohen nga administrata e Donald Trump është edhe 'Tirana zyrtare'.
Ndaj mallrave të importuara nga Kosova është vendosur tarifë prej 10 për qind, ndaj atyre nga Shqipëria 10 për qind, Serbia 37 për qind, Bosnia e Hercegovina 35 për qind, dhe Maqedonia e Veriut 33 për qind. Për Shqipërinë, tarifa e përgjithshme prej 10% do të aplikohet mbi të gjitha eksportet drejt SHBA-së, përfshirë produkte si tekstilet, veshjet dhe produktet bujqësore që eksportohen në sasi të kufizuara.
Sipas grafikut Shtetet e Bashkuara do t’i vendosin Bashkimin Evropian një tarifë prej 20%, Vietnamin me një tarifë prej 46%, Tajvanin 32%, Japoninë 24%, Indinë 26%, Korenë e Jugut 25%, Tajlandën 36% e kështu me radhë. Trumpi ka bërë të qartë për të gjithë liderët botërorë se nëse ata duan të përjashtohen nga “tarifat e tij reciproke”, atëherë ata duhet të ndryshojnë politikat e tyre tregtare. Për presidentin republikan, volumi i mallrave që SHBA-të importojnë nga vendet e tjera është shumë më i madh se volumi i mallrave amerikanë që eksportohen, dhe kjo diferencë është e padrejtë për kreun e Shtëpisë së Bardhë. Dollari ka pësuar një rënie të dukshme kundrejt euros pas njoftimit të presidentit amerikan Donald Trump për tarifa të përgjithshme për pjesën tjetër të botës, me një nivel bazë prej 10%.
Zyrtarë të lartë të Shtëpisë së Bardhë njoftuan se tarifa bazë prej 10% do të hyjë në fuqi më 5 prill, ndërsa tarifat reciproke do të hyjnë në fuqi pas një jave, më 9 prill./ZËRI
