TIRANË- Të shtëna me armë zjarri janë regjistruar në orët e para të mëngjesit të sotëm, në rrugën “Selaudin Zorba”. Policia bën me dije se një 45-vjeçar ka qëlluar me armë zjarri në ajër, pas një konflikti për motive të dobëta. Si pasojë, ka mbetur i plagosur lehtë një 37-vjeçar, i cili ndodhej pranë vendit të ngjarjes.
Pas të shtënavë, 45-vjeçari është larguar nga vendngjarja, ndërsa Policia njofton se ka arritur ta identifikojë dhe po vijon punën për lokalizimin dhe kapjen e tij.
Njoftimi i Policisë:
Identifikohet dhe shpallet në kërkim një 45-vjeçar, i cili dyshohet se ka qëlluar me armë zjarri në ajër, ku mbeti i dëmtuar lehtë një shtetas.
Shërbimet e Komisariatit të Policisë Nr. 4, pas njoftimit të marrë se rreth orës 03:30, në rrugën “Selaudin Zorba”, një shtetas kishte qëlluar me armë zjarri në ajër, organizuan menjëherë punën dhe shkuan në vendngjarje, për të sqaruar rrethanat dhe autorësinë e rastit.
Si rezultat i veprimeve të para hetimore, u bë i mundur identifikimi i autorit të dyshuar, shtetasit Xh. Xh., 45 vjeç, i cili u shpall në kërkim dhe vijon puna për lokalizimin dhe kapjen e tij.
45-vjeçari, dyshohet se pas një konflikti për motive të dobëta ka qëlluar me armë zjarri në ajër. Si pasojë në afërsi të vendit të ngjarjes ndodhej shtetasi M. G., 37 vjeç, i cili ka mbetur i dëmtuar lehtë.
Materialet procedurale iu referuan Prokurorisë, për veprime të mëtejshme.
