TIRANË-Prokuroria e Posaçme ka publikuar një bilanc për vitin 2024. Sipas të dhënave, 236 prej tyre, ose 37.5%, janë hetuar nën masën e sigurimit “arrest me burg”, bazuar në nenin 238 të Kodit të Procedurës Penale. Ndërkohë, 246 persona, që përbëjnë 39.1% të totalit, janë hetuar në gjendje të lirë. Pjesa tjetër, 147 persona, ose 23.4%, janë hetuar nën masa të tjera sigurie.
Duke iu referuar të dhënave nga Drejtoria e Burgjeve, SPAK shkruan se numri total i personave në paraburgim për vitin 2024 është 2791 persona, ku vetëm 270 persona ose 9.7% e tyre janë të hetuar nga Prokuroria e Posaçme.
Bilanci i Prokurorisë së Posaçme vjen pas një reagimi të kryeministrit Edi Rama, i cili një ditë më parë në rubrikën 'Sy më sy' duke komentuar arrestimin e kryebashkiakut Erion Veliaj, u shpreh se paraburgimi po bëhet normë për të kapur e kyçur brenda pa gjyq këdo qoftë.
'Ne kemi hyre në nje fazë tjetër si SPAK dhe drejtësia. Duhet të kemi pozicion kritik. Nuk duam e nuk do të tolerojmë një sistem të njëanshëm, thjesht të pavarur por jo profesional në shkelje të standardeve demokratike që do të thotë të gjithë kritereve të lirive e të drejtave që bëjnë diferencën mes drejtësisë në diktaturë e autokraci e asaj në demokraci. Prandaj dhe ne kemi hyrë në fazë tjetër. Na duhet të kemi një pozicion kritik për të gjitha gjërat që nuk shkojnë. Nuk mund të pranojmë në emër të pavarësisë të intimidohen njerëz që merren në pyetje, të kapërcehen fazat e hetimit e gjykimit e as të pranojmë që paraburgimi të bëhet normë për të kapur e kyçur brenda pa gjyq këdo qoftë, kur kushtet e domosdoshme që duhen plotësuar për të paraburgosur dikë janë të qarta e nuk kanë të bëjnë me një pjesë që janë konsideruar të përmbushura,'-u shpreh Rama.
Kujtojmë se me urdhër të Prokurorisë së Posaçme janë arrestuar deputetë, ministra, ish-ministra, apo dhe kryebashkiakë. Ndër më të fundit janë: presidenti i Partisë së Lirisë Ilir Meta, kryebashkiaku i Tiranës Erion Veliaj, ish-ministri i Shëndetësisë Ilir Beqaj, ish-deputeti socialist Jurgis Çyrbja./ZËRI
