DURRËS- Rrebeshet e shiu kanë shkaktuar përmbytje në Durrës, duke krijuar problematika të shumta në disa zona të qytetit. Qindra banesa në zonën e Durrësit të Ri, Shkozet, Nishtulla, kryqëzimi pranë burgut janë të dëmtuara pas reshjeve të dendura të shiut. Lajmin e bëri të ditur kryetarja e bashkisë së Durrësit, Emiriana Sako përmes një postimi në Facebook.
Mësohet se vetëm gjatë ditës së premte (31 janar) janë verifikuar 173 shtëpi, ndërsa në dy ditë pune, numri total i banesave të verifikuara ka arritur në 273. Procesi i evidentimit po vijon edhe sot, ndërsa autoritetet po punojnë për të vlerësuar shkallën e dëmeve dhe për të ndërmarrë hapat e nevojshëm për mbështetjen e familjeve të prekura.
Moti i keq me reshje të dendura shiu solli sërish përmbytje në vend. Përveç Durrësit ku situata u raportua më kritike, probleme pati edhe në Vlorë, Shkodër, Lezhë dhe Tiranë./ZËRI
