BRITANI E MADHE- Një shtëpi në Shrewsbury Close, në zonën Bloxwich të Walsall, Angli, është përfshirë nga flakët duke lënë të plagosur rëndë dy shqiptarë nga Tepelena. Sipas autoriteteve britanike, banesa dykatëshe që u shkatërrua nga zjarri, dyshohet të ketë shërbyer si shtëpi bari për kultivimin e lëndëve narkotike. I gjithë shpërthimi që ka ndodhur është kapur nga kamerat e sigurisë të shtëpive ngjitur banesës që u dogj. Pamjet janë publikuar në "Dailymail".
MOMENTI I SHPËRTHIMIT:
Sipas "TopChannel", një shqiptar në Birmingham, ka treguar për mediat se dy të rinjtë shqiptarë që ndodheshin brenda janë nga Tepelena. Njëri prej tyre ka djegie në 30% të trupit, ndërsa tjetri është në gjendje kritike me 60% djegie, i shtruar në Spitalin Queen Elizabeth në Birmingham. Por ende nuk dihet identiteti i tyre i plotë. Aktualisht, të dy janë dërguar në spitalin Queen Elizabeth të Birminghamit dhe ende nuk ka detaje të reja lidhur me gjendjen e tyre shëndetësore.
Një banor i zonës përshkroi tmerrin që përjetuan nga zjarri i përhapur me shpejtësi edhe në banesat e tyre.
“Këta dy djem ikën nga shtëpia dhe dolën në rrugë – njëri ishte me një bluzë blu, tjetri me të bardhë. Pastaj zjarri u përhap dhe përfshiu shtëpinë për rreth dhjetë minuta para se të arrinte shërbimi zjarrfikës. Vetëm ata do ta dinë se çfarë e shkaktoi, por mua më duket e çuditshme – që e gjithë pjesa e sipërme e shtëpisë të shkatërrohet në atë mënyrë, ndërsa kati i poshtëm është në rregull, nuk është normale.”
Derisa zjarri u shua, banorët e zonës u evakuuan nga zona, madje një kishë lokale ofroi strehim dhe vullnetarë nga Kryqi i Kuq për mbështetje të qytetarëve./ZËRI
